आत्मचिंतन

दुसऱ्याचे दुखवू नये मन ।
आपल्या अज्ञानाचे करू नये प्रदर्शन ।
आत्मक्लेशाचे जनन ।
करू नये ।।

अतृप्त , अशांत , चंचल मन ।
अपमान होण्याची होत लक्षण ।
असावे सावध प्रत्येक क्षण ।
अखंडित ।।

स्वस्थ , शांत , प्रसन्न ध्यान ।
चारचौघात वाढवी मान ।
थोरामोठ्यांचा सन्मान ।
फलदायी ।।

तोलून बोलावे ।
मजबूत जेवावे ।
अभ्यासात असावे
नियमित ।।

प्रलोभांना फसू नये ।
क्षुल्लक गोष्टींनी रुसू नये ।
जोरजोराने हसू नये ।
विनाकारण ।।

करोनिया विनोद , संवादफेक  अन  नक्कल ।
खळखळोनी हसवावे सकल ।
स्वपर ज्ञान होते द्विगुणि ।            
करोनिया विज्ञान , तंत्र , शास्त्राची उकल   ।।

गीत संगीत कविता अन गजल ।
मैफिली पर्यंत मारावी मजल ।
आपला छंद , आवड अन कल ।
मनोमन ओळखावा सकल  ।।  

काव्य शास्र विनोदात ।
आनंदे घालवावा काळ ।
आळस, निद्रा, अन कलहात ।
होतात मूर्ख लोकांचे हाल ।।