मला वाटते वारा होवून............

मला वाटते वारा होवून गिरी शिखरातून मुक्त फिरावे ।।


सरितेला देवून वेग , मेघ फुला कडे घ्यावी झेप
कुसुमातील सुगंध चुंबून आसमंतात गिरगीरावे ।।

घेवून प्रचंड वादळ वेग , लोटत न्यावा श्यामल मेघ
नंतर होवून शीतल गार , ओढावी मेघ स्तनाची धार  ।।

आनंदून मग धरणी मातेला , घालावा जलबिंदूंचा हार
मृगाचा संदेश देवून , बळी राजाचे दुखः हरावे ।।

प्राण कुपीचा देवून मेवा , करावी चराचर सृष्टीची सेवा
जीवन गाण्याची छेडीत तार , करावा आसमंतात मुक्त विहार ।।

फुलराणीची काढून छेड , लावावे बाल रविचे वेड
तुळशी मातेचा घेवून धूप , नटवावे  संध्याचे रूप ।।

शांत सौम्य घेवून स्वरूप , सुगंधासाठी खूप झुरावे
मला वाटते वारा होवून गिरी शिखरातून मुक्त फिरावे ।।